11-сынып оқушыларымен кәсіби бағдар беру кездесуі

2025 жылғы 10 қаңтар күні Щучинск қаласындағы №8 мектеп-гимназиясында 11-сынып оқушыларымен кәсіби бағдар беру кездесуі өтті. Кездесуді осы мектептің 2023 жылғы түлегі, қазіргі уақытта Радиоэлектроника және байланыс әскери инженерлік институтының студенті Амурзақов Әділхан жүргізді.

Әділхан институтқа түсу жолындағы өз тәжірибесімен бөлісіп, оқу процесінің ерекшеліктері мен осы беделді оқу орнының түлектеріне ашылатын мүмкіндіктер туралы айтып берді. Ол радиоэлектроника, байланыс және ақпараттық технологиялар саласында жоғары білікті мамандарды даярлауға бағытталған білім беру бағдарламасына ерекше тоқталды.

Сондай-ақ, әскери білімнің ел қауіпсіздігін қамтамасыз етудегі рөлі мен қазіргі қоғамдағы офицер мамандығының маңыздылығы туралы баяндады. Әділхан институттағы студенттік өмір, әскери дайындық және оқу-жаттығу сабақтары жайында әңгімелеп берді.

Кездесу барысында оқушылар институтқа қабылдау талаптары, емтихандар, оқу шарттары мен болашақта жұмысқа орналасу мүмкіндіктері туралы сұрақтар қойды. Әділхан барлық сұрақтарға шын ықыласпен жауап беріп, жоғары сынып оқушыларын мамандық таңдауға жауапкершілікпен қарап, институтқа түсуге мұқият дайындалуға ынталандырды.

Бұл кездесу 11-сынып оқушыларының үлкен қызығушылығын тудырды. Мұндай іс-шаралар оқушылардың болашақтарын саналы түрде жоспарлап, өз мақсаттарына жетуге шабыт береді.

Мауина Д.С.